Sasuai jo sunnah tadi, pado moment Hari Rayo Qurban 1439 kini ko, tapeknyo pado hari Rabu 22 Agustus 2018, sakalian jamaah Musajik Babussalam nan maliputi warga Wisma Indah I, Wisma Warta dan Bunda, Kelurahan Ulak Karang Utara (UKU) Kecamatan Padang Utara, Kota Padang - Provinsi Sumatera Barat Padang mahadokan acara "babuko basamo puaso sunnah basamo salapeh kutubah Idul Adha", batampek di gedung MDA nan masih salingkuangan musajik.
Sabalum apak-apak, anak-anak mudo panitia qurban jo sakalian jamaah Musajik Babussalam lainnyo basansam mangicok lontong, bubua kampiun, raga-raga sarato bamacam ragam parabuang (cemilan-red) lainnyo, pihak ibuk-ibuk alah sajak lapeh parak siang basitumpeh manyiapkan hidangan babuko basamo puaso sunnah lapeh kutubah Idul Adha ko.
Salain baragam makanan pangganja paruik, tasadio pulo aneka minuman hangek, mulai dari kopi hitam hinggo teh manih, salain aie mineral. Udaro nan tadinyo agak dingin karano hujan samalaman, taraso hangek, mambuek sagalo nan tahidang laris manis. Hati nan sanang mambuek saluruah nan hadir sabana basansam manikmati hidangan babuko basamo pagi tu.
Sasudah babuko basamo, sakalian warga nan sadang basanang hati indak lupo mangabadikan kebersamaan nan ado dalam rupo bakodak basamo. Ado nan bapoto samo kaluarga masiang-masiang. Jo anak minantu, jo tetangga subalah rumah, nan saarisan dan sabagainyo. Warga nan barangkali jarang basirobok karano tabaok untuang jo parasaian masiang-masiang sabana mamanfaatkan momentum basamo ko untuak saliang bama'af ma'afan sakaligus malapeh taragak sarato saliang basenda gurau satu samo lain.
Pado poto di bawah ko, ambo Nasrul Djalal nan kini alah biaso dipanggie "Opa" dek sapuluah urang cucu (paliang kida), bapose basamo mantan Katua Musajik Babussalam H. Azurlis Habib, anggota DPD RI H. Leonardy Harmainy, mantan bendahara Musajik Babussalam H. Syarbaini, kamudian nan paliang suok; Katua Musajik Babussalam nan kini, Amril Baharuddin.
Sadangkan pado poto nan ciek lai di bawah ko, apak-apak Wisma Indah 1 - Wisma Warta - Bunda UKU samo-samo basimangaik manyanyikan lagu kebangsaan "Indonesia Raya" dalam acara perayaan HUT ke-73 Republik Indonesia hari Minggu 19 Agustus 2018, nan dimeriahkan babagai lomba.
Dari suok ka kida; mantan Katua Musajik Babussalam Dr. Nazief Manaf jo H. M Iqbal, sudah tu anggota DPD RI H. Leonardy Harmainy, Katua Musajik Babussalam Amril Baharuddin, sarato ambo sendiri "Opa NJ".
Alhamdulillah Waa Syukurillah, rangkaian acara perayaan HUT ke-73 di lingkuangan Wisma Indah 1 - Wisma Warta - Bunda balansuang lancar jo sukses, salah satunyo berkat sokongan H. Leonardy Harmainy salaku donatur.
"Pado kesempatan nan ko, ambo ateh namo kaluarga, anak manantu jo sakalian cucu mahaturkan salam sambah, salamaik hari rayo Idul Adha untuak sakalian pambaco media online www.sumatrazone.co.id dimano sajo barado. Mohon maaf lahie jo bathin".
# Opa NJ atau H. Nasrul Djalal adalah Wartawan Senior/Sepuh, pernah menjadi pengasuh Surat Kabar Harian HALUAN di Padang, mantan Sekretaris PWI Sumatera Barat di era Ketua Kamardi Rais Datuak P Simulie, sekarang Ketua Dewan Redaksi www.sumatrazone.co.id, juga Member of Conferedation of Asean Journalist (CAJ) Singapore - 1998
