Bapose dakek jawi qurban nan alah didabiah. Dari kida ka suok; Katua Musajik Babussalam UKU, Amril Baharuddin, anggota DPD-RI H. Leonardy Harmainy, wartawan sepuh H. Nasrul "Opa NJ" Djalal sarato Katua Koperasi Babussalam, Hasanuddin

SACARO umum, Alhamdulillah kondisi ekonomi masyarakaik awak kini ko baransue makin mambaiak. Kondisi nan basaratoan jo samakin tingginyo simangaik baribadah, ditandoi samakin batambahnyo masyarakaik awak nan sato bakurban pado moment hari rayo Idul Adha 1439 Hijriah ko. 


Kasimpulan di ateh diutarokan senator asal Minangkabau, H. Leonardy Harmainy, SIP, sasudah bakuliliang Kota Padang maninjau kagiatan warga muslim mandabiah jawi jo kambiang qurban salapeh sumbarang rayo, hari Raba'a kalam hari, tanggal 22 Agustus 2018.  


Rasonyo, indak salah pulo politisi senior nan kini bakantue di Sanayan Jakarta salaku anggota Dewan Perwakilan Daerah Republik Indonesia (DPD RI) ko, mahambiak kasimpulan sarupo itu, maingek harago taranak qurban (jawi jo kambiang) dari tahun ka tahun condong naiak, alun pernah turun. Sairiang jo harago taranak qurban tadi, pitih qurban nan musti dibayie dek masiang-masiang warga nan sato baqurban tantu ikuik batambah pulo. 

Liau mancontohkan naiknyo pitih qurban untuak saikue kambiang di Musajik Babussalam Ulak Karang Utara (UKU), Padang, rumah ibadah nan indak baetu jauah dari kadiaman baliau di Wisma Indah 1. 


"Pitih qurban nan musti disetorkan warga ka panitia untuak saikue kambiang, rayo haji kini ko bageser naiak dibandiang rayo haji tahun 2017. Namun sacaro kasaluruhannyo, warga salingkuang Musajik Babussalam malah batambah nan sato baqurban. Kondisi nan samo ambo amati balaku pulo di musajik-musajik jo mushala-mushala lain di Kota Padang. Fenomena nan patuik kito syukuri, bahwasanyo untuak urusan ibadah urang awak indak kenal nan istilahnyo krisis global," kato Leonardy pulo.

Musajik Babussalam nan diapik komplek Wisma Indah - Wisma Warta jo Bunda UKU, rayo kini mambantai sabanyak sambilan baleh ikue jawi, ditambah tigo ikua kambiang. Baratuih warga jo anggota masyarakaik nan bamukim di salingka tigo komplek parumahan partamo di Sumatera Barat tu samo-samo mandapek dagiang qurban. Manjalang mugarik, dagiang qurban alah habih dibagikan. 

Lazimnyo, kagiatan mandabiah taranak qurban di Musajik Babussalam UKU diadokan sahari sasudah jatuahnyo hari rayo haji. 

Manuruik panitia qurban, palaksanaan mandabiah hewan qurban memang talambek sajam dari rancana samulo. Nan mustinyo pukua 07.30 alah dimulai, jadi undur ka pukua 08.30. Sababnyo, dunsanak-dunsanak awak nan tukang bantai talambek tibo di lokasi. Ahamdulillah, pado akhianyo sagalo sasuatu lai bajalan lancar. 



Basitungkin bakarajo saharian, baiak panitia maupun tukang bantai lai dapek jatah makan siang barupo nasi bungkuih ditambah aneka parabuang untuak panambah tanago, nan alah disiapkan dek seksi konsumsi. 

Paginyo, disadiokan pulo nasi goreng jo kopi angek, teh manih. Manjalang tangah hari ado pulo kue-kue pambangkik salero.

"Ambo malihek jo mandanga sagalo  sasuatunyo lai bajalan elok- elok sajo. Ndak ado masalah atau ricuah-ricuah nan indak baguno. Panitia di mato ambo, yo lai sabana bakarajo. Warga nan mahambiak dagiang lai pulo datang jo muko nan janiah hati nan sanang. Rasonyo lai indak ado dunsanak awak nan maraso kecewa bagai doh. Alhamdulillah," baetu diutarokan Leonardy, nan jauah hari parnah manjabaik Katua DPRD Sumbar jo Katua DPD Partai Golkar Sumbar, Kamih pagi tanggal 23 Agustus 2018 kapatang. 

Pandapek sosok bijak nan pernah pulo manjadi Ketua MPW Pemuda Pancasila Sumbar ko, diiriangi angguak Katua Musajik Babussalam UKU, Amril Baharuddin jo Katua Palaksana Qurban, Junaidi Jasman.


#Catatan Idul Adha 1439 Hijriyah Opa NJ, disarikan kembali oleh redaksi www.sumatrazone.co.id 
 
Top