Den karedit an wa-ang onda bebek, sabulan luruih setoran wa-ang lancar, bulan katigo onda nyo tarik dek dealer, nan wa-ang galak sengeang juo. Kama pai utak ang? Pakai utak ketek snek tumbuang !
Den suruah wa-ang ka ladang, alun cangkua wa-ang pacik, nan ampu lah wa-ang gusuak-gusuak an ka tunjuak. Ang sabuik sado alah macam pitih. Mulai dari pitih rokok, pitih makan siang, hinggo pitih rokok untuak bekoh malam gai. Teya wa-ang mah !
Den cari-an wa-ang calon ka bini. Ang baok nak gadih urang sakali duo, hari katigo lah wa-ang tinggakan pulo inyo. Lanyah nak gadih urang dek wa-ang. Alasan wa-ang saketek se nyo, ang kecek an maleh ka paja tu dek muluik amak e cipeh bana. Kama lo pai e tu ha?
Nan aden sebagai mamak wa-ang iyo lai bapitih, tapi wa-ang se nan aden kurehan taruih manaruih bacakak lo aden bekoh jo Tek Tangah wa ang tu. Sudahlah anak den iyo basusun paku, nan wa-ang basusun parangai lo.
Paniang palo Den. Iko bana nan mambuek kapalo den sakik.Gara-gara sakik mamikiakan wa-ang amuah raso e aden kababini ciek lai untuak mananangkan utak dek ulah mamikiakan parangai wa-ang…Nan Iko ijan wa-ang sabuisabuik lo ka Tek Tangah ang, cai muncuang buruak ang tu bekoh kanai garumeh….
Nan Abak wa-ang kadiarok? Pambali rokok dek Abak wa-ang tu se masih nyo subsidi juo baru dek sanak padusi e.Abak wa-ang tu rancak dek bantuak se tu nyo. Rancak di labuah! Itu nan mambuek ati adiak den tagilo-gilo ka nyo dulu tu…mangko lahialah wa-ang baradiak kakak.
Lah den tagah dulu adiak den tu mah. Tapi nyo mada. Kareh ati se nan nyo paturuik an. Makin ditagah, nyo ogoh pulo urang jo saboto racun mancik. Tapi indak juo ba-a doh, mauruik dado molah kami sakaum.
Paliang indak, dek tampang abak-ang tu gagah, pamacah-macah piriang se jadi juo molah. Eee, indak kami sangko, abak wa-ang tu sabana pamacah piriang na rupo e.Inyo Pitih se dek abak wa ang tu nan kurangtu nyo, rabo banyak dek inyo tu.. Bacakak abak jo amak ang, piriang di dapua nan nyo pacah-pacah. Abih pacah sado alahe piriang pusako tuo.
Sakik palo Den. Nan wa-ang dapek adik buah salek, sampai gadang aden juo nan mangamehan. Sakik palo den mamikia-an wa-ang sakaluarga, bekoh den bae babini ciek lai….mampananang-nanang pikiran den nan kacau mamikiakan wa-ang, abang wa-ang, adiak wa-ang sarato amak ang.
Aden batangguang jawab ka wa-ang dek maraso aden ko sebagai Mamak. Aden patuah jo alua adaik anak dipangku kamanakan dibimbiang. Aden ko kalaki Minangkabau, mamak dek wa-ang tibonyo.
Kamanakan barajo ka mamak
Mamak barajo ka pangulu
Pangulu barajo ka mufakaik
Mufakaik barajo alua jo patuik
Alua jo patuik barajo ka nan bana
Nan bana tagak sandirinyo
nan wa-ang sajak dulu indak bisa tagak surang!
Wa-ang tongek-tongek aden sebagai rajo, nan pitih den waang alua jo wa-ang karuak juo. Untuang se aden lai badagiang taba,wa-ang bapisau tajam. Nan pisau ang tu tiok sabanta marawik dagiang den se taruih lah tipih dagiang den dibueknyo, lah tandeh pitih den kini…dek mambela wa-ang juo baru.
Wa-ang pai rundo malam, indak upah panjek se nan wa-ang lantuang, jo mangga-mangga urang ruruik buah e dek wa-ang panjek; aden juo nan kanai upek.
Kini ko, ancak wa-ang kalua dari rumah gadang nan ko.
Tasarah kama wa-ang pai marantau. Nan basilek wa-ang lah den aja sajak ketek, nan mangaji wa-ang lah diaja dek Mak Utiah Ang. Tu modal wa-ang.
Nasihaik den ka wa-ang ciek jo duo nyo, indak banyak-banyak bagai.
Partamo; kalau wa-ang pai marantau, dunsanak nan ka waang cari dahulu, jan pacar nan wa-ang cari dulu ndak…taniayo nak gadih urang dek wa-ang bekoh.
Kok bajalan luruih-luruih, ijan bakelok-kelok. Kok macet di muko, cari jalan mancik capek. Buliah indak abih wakatu wa-ang di jalan.Kok wa-ang kamamotong jalan urang, nan urang jan wa-ang siku pulo ndak. Tadangek paruik urang, nyo asah ladiang mancari wa-ang bekoh….
Kok mangecek jan kareh-kareh, ingek urang nan katasingguang. Kok babiso lidah wa-ang, nyo cukua dek urang rami-rami lidah ang tu bekoh.
Kok kamancaliak tarang-tarang, jan mancaliak di nan galok. Mancaliak di nan galok, tahu urang, nyo tuduah wa-ang dek urang mancibuak, nyo pagontongroyongannyo wa-ang dek urang bekoh. Nyanyak badan ang.
Jan banyak na angguak ang. Lai jaleh dek ang ko ? Ang bajaleh-jaleh lah, heran den mancaliak angguak ang tu mah
Lah buliah den lanjuik an ko…?
Ingek duri nan kamancucuak, Kan? Kok kanai cucuak kaki wa-ang dek duri, jan jo alu wa-ang cukia-cukia. Cukia jo samek. Kalua-an duri tu lambek-lambek, baru pai barangkek. kalau duri indak kalua, tetanus wa-ang bekoh, tapaso kaki wa-ang tu kanai karek.
Capek kaki ringan tangan. Jan wa-ang capek tangan, apo nan tampak jan wa-ang semba. Bagawa wa-ang bekoh. Jan mahangguak-hangguak se lu. Lai wa-ang mangarati?
Kok mandi barasiah-rasiah kok kabajalan batagok-tagok. Jan alun mandi wa-ang lah pai, wa-ang duduak urang kalua; dek baun wa-ang baun cimporong masak.
Nyampang wa-ang makan di rumah urang, nan capak jan kareh bana. Buruak capak wa-ang, disangko urang wa-ang dukun bekoh. Sabalun makan,di saku harus wa-ang siapkan lidih tusuak gigi. Kok nyampang paruik ang lapa, pitih sadang indak adoh, mangko lakeh ang gigik lidih tusuak gigi tu.
Salek an dengan gagah di gigi ang tu. Jan sampai, sudah lah lapa, gaya indak adoh pulo. Sasusah apo pun wa-ang di rantau urang, nan tagak tagok juo.
Bajalan tagak jo tagok bukan bajalan ongeh. Ha, takah iko…pandangan luriuh ka muko. Kok bajalan liek suok kida, jan sampai wa-ang nyo lapia dek oto. Nan tangan jan wa-ang kambang-kambangkan pulo. Tinggi bana sayok ang tu kambang, kok tabang wa-ang bekoh ba-a….?
lai jaleh dek ang tu?
Itu nasihaik dennyo?
Kok pitih den agiah, jak dulu abih se dek ang. Kiniko nasihaik. Pitih? Indak. Indaaak!
== “Tapi Mak, pitih jua tanah pusako wak nan lah jadi ruko tu, alah nyo agiah Dek Tang Ateh Mak?”
“Kanciang ang Mah! Itu lo nan wa-ang ungkik-ungkik!” (*)
# Mamak Suga
@hatipena
