(Apo Sikap Kito?)
Catatan Budaya: Pinto Janir
Lah lamo bana kami tak maota-ota soal budaya.
Kalaupun kami basuo, duduak di kadai, nan diotakan nan tun labiah acok mambahas soal politik lokal.
Kadang-kadang kalau kopi sadang hangek, rokok sadang babungkuih, ota tu bisa maepe-epe ka soal parang Irak-jo Amerika.
Irek lihia tagang. Mato manggadang. Kadang-kadang namuah gai sampai malapia meja lapau urang.
Gunjiang politik tak bakatantuan ko, maurai-urai satu kepentingan kapado kepentingan nan lain nan bamuaro ka ruang tangah.
Kalau lah maota soal nan ko, namuah bahabih habih hari dibueknyo. Namun baitu, nan kasimpulan tak kunjuang dapek juo.
Walau takah tu bana, bisuak diulang lo ota nan samo liak. Baitu sataruihnyo.
Ota di lapau memang sero. Kalau tak ingek wakatu, bisa-bisa subuh se nan manjadi pambatehnyo.
Lapau memang manyimpan banyak carito.
Carito soal kuaso nan sadang taganggam sero. Kuaso nan indak tapacik baujuang cilako.
Kuaso nan takapik dek jalan dipasampik tukang picik. Hiduik sampik dek ulah tukang kuas nan acok marabik-rabik.
Sudah tu, carito mambahas si tukang kuas salingka urang nan bakuaso memang lamak untuak disimak. Lamak untuak bahan carito bagalak-galak.
Kadang-kadang antah ma nan tubo, antah mano pulo nan gulo. Tak jaleh zatnyo lai.
Umpan serak,umpan puyu, umpan hiu, umpan lumbo-lumbo, asal lai banamo umpan , inyo tangguak rapek.
Soal itu tubo, soal itu jarek di kamudian hari, tak paduli bagi “urang-urang nan ko”. Nan paralu, dapua “ngebul” hasil kibul.
Caliak mungko lah bacimuntu. Lah bak bacando hantu.
Nan indak mandapek pangguang, nan indak santiang manguas licin, kalau tak kuek , tak malakek.
Kalau bola cogok bola tangguang, tak ditapuang, siap-siap lah galang-galang marapuang.
Kanai hampai. Kanai danguak. Kanai simpai. Kanai tungkai.
Cubo takok, kama ujuang caritonyo?
Soal iko, salasai !
------
Mari kito masuak ka topik salanjuiknyo.
Nah, pado malam Salasa tanggal 21 April 2026 kapatang nan ko, tapek sasudah sumbahyang mugarik, datanglah duo dunsanak ambo dari Padang Kota Tacinto, ka Puri Indah Kembangan Jakarta, di kadiaman ambo.
Nan datang nan tun, bukan sumbarang urang. Nan ciek tagok, nan ciek gagah. Nan ciek banamo Uda Hasnul, nan agak-agak mudo tangguang banamo Yance Kurniawan.
Nan Uda Hasnul ko sajak mudo lah manjadi aktivis sosial. Urangnyo kritis.
Kalau adoh mancaliak tunggak adia lah mulai agak-agak guyah snek, tugeh moralnyo mampaluruih tonggak nan ka hampiang rabah nan tun. Suko bana, Uda Ambo ko mambela urang-urang nan tazalimi.
Liau ko, istilah e ujuang tombak kaadilan ateh namo hati nurani.
Namuah tagang urek lihianyo untuak mambela urang. Bilo paralu, nyo kalangkan urek lihianyo untuak sasuatu nan banamo; adia nan tun. Uda ambo ko, uda nan santiang. Uda nan setia bakawan.
Da Hasnul rang Koto Gadang nan tasabuik banyak melahirkan tokoh tokoh hebat, takah H Agus Salim.
Santiang badiplomasi, lihai pulo mandakek-an hati ka banyak urang. Wajar sajo kalau baliau banyak kawan. Alemu perkawanan liau cukuik mantap. Tageh !
Nan Yance, iko tokoh mudo. Urangnyo tinggi badagok. Baliau salah surang pamuka masyarakaik di tampeknyo barado. Yakni, Padang kota nan rancak.
Urang sagan ka liau, bukan dek karano pangka langan baliau gadang, bukan baitu.Tapi dek karano, baliau ringan tangan mambantu urang lain.
Yance, di LMB Minangkabau adolah salah surang jajaran Dewan Pambina LMB, yang di antaro lain diisi dek barapo tokoh masyarakaik Minangkabau. Antaro lain, adoh Pak H Halius Hosen SH, Brigjen Riky, Febby Datuak Bangso, Belly Saputra Datuak Djano, Buya Mas’oed Abidin.
Lamo kami bacarito.
Apo isi carito?
Adolah soal kagamangan basamo tahadok apo nan kini manimpo ranah bundo. Salah satu nan kami bahas, soal urang-urang bege nan balaku manyimpang nan istilah kerennyo LGBT.
Nagari awak ko nagari nan baradaik.Nagari nan baugamo. Nan adaiknyo basandi syarak, syarak basandi Kitabullah.
Kaum ‘pahantak’ matoari, sudah tu, fenomena bacaruik-caruik pungkang di media sosial, kamudian soal maruyaknyo narkoba nan sampai manyapu suduik palosok nagari nan kito cintoi... jadi topik utamo bahan carito.
Sudah tu gai , soal kekhawatiran kito tahadok malpuak atau lanyoknyo bahaso ibu. Bahaso Minangkabau.
Kasimpulannyo, apo dan ba-a sikap LMB Minangkabau tahadok kajadian nan mambuek aia mato baganang ganang dir uang dado?
Iyo sabana pacah paruik dibueknyo.
Ba-a lai ko?
----- Jakarta 21 April 2026-
